Ragga

Hrós og óhróður

2006-11-06T17:31:00.000Z

Þeir sem eiga hrós skilið:

Inga og Árni fyrir að vera ógeðslega dugleg í íbúðinni
Mamma fyrir að vera alltaf sjúklega dugleg í MBA náminu
Bíómyndinni Lake House fyrir að vera rosa rómantísk!
Guðfinna fyrir að lenda í 4. sæti í prófkjöri Sjálfstæðismanna
Pabbi fyrir að baka bestu pizzu í heimi!
Tengdó fyrir að vera massa dugleg í afeitruninni!
Björgunarsveitirnar - fyrir að fatta upp á Neyðarkalli :)
Júlli - fyrir að vera beztur í heimi og þola mig í 3 ár!

...og örugglega miklu miklu fleiri!

Þeir sem eiga óhróður skilið:

Við fjórar frænkurnar fyrir að hittast næstum ALDREI!
Sölumaðurinn í Heklu fyrir að gleyma mér tvisvar!
Blaðamenn Extra Bladet fyrir alla vænisýkina
Nammi fyrir að vera sjúklega gott!!!

..og örugglega miklu miklu fleiri!

Vinnavinnavinnavinna

2006-10-24T19:36:00.000Z

Nú er lítið annað gert en að vinna vinna vinna og vinna! Hef ég oft verið busy en ég held ég hafi þó aldrei verið jafn ofurupptekin eins og akkúrat núna! En er ekki alltaf sagt að ef maður vilji láta eitthvað gerast þá eigi maður að tala við busy manneskju??? Eins gott samt að drekkja sér ekki í þessu öllu saman en það styttist nú óðum í hið langþráða sumarfrí - Flórída eftir aðeins 3 vikur - og þá verður sko slappað af og notið lífsins újeeehhh!

Bandaríkjamenn

2006-10-17T10:16:00.000Z

Það er margt hægt að segja um Bandaríkjamenn. Þeir eru sennilega ein dáðasta þjóð í heimi - af sjálfum sér! ...en á sama tíma hataðasta þjóð í heimi - af öllum öðrum! Þeir eru frægir fyrir feitasta fólk í heimi, frægasta fólk í heimi og jah... eflaust mjög margt annað sem ég ætla ekki að telja upp hér.

Ástæðan fyrir þessu bloggi mínu er nú samt annars eðlis. Ég rak augun í það í morgun að Bandaríkjamenn munu í dag verða rúmlega 300 milljónir talsins. Þeir eru (þegar ég skrifa þessi orð) nákvæmlega 299.999.531 og m.v. þær forsendur að þar í landi fæðist nýr Bandaríkjamaður á 7 sekúndna fresti, deyji á 13 sekúndna fresti og að innflytjendum af erlendum uppruna fjölgi (nettó) um einn á 31 sekúndna fresti, þá munu þeir rjúfa 300 milljóna markið í dag! Þeir sem vilja fylgjast "live" með þessu gerast geta smellt hér.

Fjölskyldupakkinn!

2006-09-28T14:22:00.000Z

Jahérna! Rosalega er maður fljótur að detta inn í fjölskyldupakkann! Eftir að bumbulíus varð að veruleika hefur maður lítið annað gert en að pæla í öllu sem snýr að því. Fyndið hvað lífið tekur snögga 180° beygju þegar svona kemur upp.

Maður hættir auðvitað að láta sjá sig á djamminu - og það sem verra var - áður en leyfilegt var að uppljóstra leyndarmálinu náði maður að fá á sig "beiler" stimpilinn ógurlega hvað skemmtanalífið varðar. En hey þið efasemdamenn og konur - nú skiljið þið! :D

Svo þarf maður að fara að huga að praktísku málunum. Litli Skódi ljóti er t.d. ekki nógu bosmamikill til að rýma eitt stk. golfsett - hvað þá barnastól, barnakerru og allt tilheyrandi. Svo nú er maður farinn að líta svona aðeins í kringum sig - og viti menn - haldiði að "station" sé ekki bara orðinn álitlegur kostur - eitthvað sem ég hefði ALDREI séð mig kaupa fyrir 6 mánuðum!!! Þá erum við að tala um alvöru fjölskyldukerru sjáiði - fullbúinn og með allan pakkann. Næsta skref er bara að kaupa svona "skuggaskerm" til að skýla barninu fyrir sólinni - helst kisulaga af því það er svo agalega krúttlegt!!! :Þ

Það sem mér finnst samt skrýtnasta tilhugsunin er ekki að erfingi sé á leiðinni, að við munum eignast barnið eftir ca. hálft ár eða neitt þannig - heldur að lítið kríli muni, eftir svona rúmlega 1 ár, fara að kalla mig mömmu!!! Úff úff úff!

Fyrir þá sem vilja fylgjast með er ég búin að setja inn tengil hérna undir "Gríslingar" á vefsíðuna sem tileinkuð er baunagrasinu en einnig er hægt að smella hér.

Ferlíkið í stofunni

2006-09-26T15:57:00.000Z

Þegar ég var lítil fannst mér voðalega gaman að fela mig undir sófanum í stofunni. Oftast var ég að fela mig fyrir ímyndaða ferlíkinu sem ég var oft í feluleik við en stundum var það líka bara til að fela mig fyrir pabba og mömmu áður en ég átti að fara í háttinn.

Ástæðan fyrir þessari bernskuminningu er sú að nú er komið nýtt ferlíki í stofuna. Ferlíkið er betur þekkt undir nafninu "Plasma" og er hvorki meira né minna en 42" stórt! Og nota bene, það eru ekki meira en nokkrir dagar síðan ég sagði "Við skulum bíða í tvö/þrjú ár með að kaupa plasma"!!! ...en svo dó sjónvarpið okkar í síðustu viku og svo heppilega vildi til að örfáum dögum síðar - þegar við vorum í sjónvarpsleit - bauðst okkur frábært starfsmannatilboð í gegnum móðurfélagið Dagsbrún og við ákváðum tjah... afhverju ekki bara að slá til!!!

Er Al Gore næsti forseti Bandaríkjanna???

2006-09-21T11:44:00.000Z

Ég brá mér í bíó í gær og er orðin svo rosalega menningarleg að ég fór í annað skiptið á skömmum tíma á mynd sem sýnd er á kvikmyndahátíðinni. Í gær varð myndin hans Al Gore fyrir valinu en hún fjallar um gróðurhúsaáhrifin og hvaða afleiðingar þau munu hafa á okkar ástkæru Jörð á næstu 50 til 100 árum.

Myndin olli mér síður en svo vonbrigðum - mér fannst hún raunar mjög góð og ég mæli eindregið með því að allir sjái hana. Ég var svo uppnumin af baráttuvilja í lok myndarinnar að það lá við að ég hefði sent menntamálaráðherra áskorun um að skylda menntaskóla til að sýna myndina. Ég vona eindregið að sýningum á myndinni verði haldið áfram eftir að kvikmyndahátíð lýkur en skv. fyrirfram auglýstri dagskrá er aðeins ein sýning eftir - kl. 20:00 í kvöld! ...nánar tiltekið í Háskólabíói...

Al Gore kemur auk þess skemmtilega á óvart í myndinni. Auðvitað voru klippt saman akkúrat hressustu augnablikin hans í myndina en samt - maðurinn er alls ekki jafn hræðilega leiðinlegur eins og fólk vildi vera láta þegar hann háði hatramma kosningabaráttu sína við núverandi Bandaríkjaforseta, hinn eldklára George W. Bush. Spurning hreinlega hvort Gore bjóði sig aftur fram fyrir næsta kjörtímabil og gjörsigri ekki bara??? ...sjáum til.

Bloggiddíblogg

2006-09-19T09:35:00.000Z

Sælt og blessað verði fólkið. Long time no hear. Ég held svei mér þá að maður þurfi að fara að hætta þessu bara. Ég blogga hvort sem er ekki orðið nema á margra vikna fresti. Ekki það að það sé ekki nóg að gera hjá manni, meira svona leti við að skrifa held ég.

Ég er að deyja úr sumarfríslöngun, alveg farin að telja niður - núna eru tæplega 2 mánuðir í sumarfríið mitt!!! ...veiveivei...

Annars held ég að flestallir viti það nú orðið að það er lítil baun á leiðinni hjá okkur skötuhjúunum sem er væntanleg í heiminn þann merka dag 1. apríl á næsta ári. Sjæks... svo hef ég kannski gleymt að segja einhverjum sem alveg bara missir það núna! tíhíhí... Það er spurning hvort maður setji e.t.v. upp einhverja svona síðu fyrir þá sem vilja fylgjast með því - aldrei að vita nema svoleiðis "blogg" taki bara við af þessari - sjáum til - en ég læt ykkur allavegana fylgjast með.

Bölvans gripdeild!

2006-08-23T17:31:00.000Z

Haldiði að það hafi ekki verið brotist inn í bílinn hjá okkur á dögunum og tölvunni minni stolið! Ég sem passa mig alltaf voða vel að skilja aldrei neitt verðmætt eftir í bílnum þurfti akkúrat að gleyma tölvunni þennan eina dag og þá AUÐVITAÐ var einhver óprúttinn náungi sem mölbraut rúðuna á bílnum og hirti mína ofurverðmætu tölvu! Þó það hefði verið voða pirrandi og slæmt þá var það ekki verst að tölvunni minni hefði verið stolið heldur að öll gögnin mín væru horfin! Grmf...! Svo þurftum við í þokkabót að borga sjálf fyrir að brotist hefði verið inn í bílinn vegna þess að sjálfsábyrgðin "coveraði" skaðann! Life's a bitch!

Verzló reunion

2006-08-22T12:41:00.000Z

Nú styttist óðum í reunion 5 ára stúdenta frá Verzlunarskóla Íslands en ég er einmitt í þeim hópi. Búist er við miklu húllum hæi og þetta verður án efa einstaklega athyglisvert og skemmtilegt. Maður mun vafalaust hitta einn og annan úr fortíðinni og það verður eitthvað hlegið að gömlum grallarabrögðum. Eitt það skemmtilegasta við svona reunion er að sjá hvað fólk er að gera í dag, hvort allir líti ennþá eins út o.s.frv.

Ég er nú ekki enn búin að fjárfesta í miða en ég mun án efa gera það á næstu dögum.

Þið verzlingar sem slysist hérna inn getið kíkt á reunion slóðina með því að smella hér.

Golf golf og meira golf

2006-08-21T17:07:00.000Z

Það er ljóst að golfíþróttin er hreint út sagt stórhættuleg. Þá á ég ekki við líkamlegar hættur því ekki er mikil hætta á að togna, misstíga sig eða slíta krossbönd í hita leiksins þó að vísu sé alltaf ákveðin hætta á að fá grjótharða golfkúlu í hausinn. Nei, ég meina andlega. Þessi blessaða íþrótt hefur gjörsamlega heltekið hug og hjarta míns ástkæra. Ég er reyndar sjálf mjög hrifin af henni en þetta nær náttlega engri átt hversu ástfanginn maðurinn er af þessu. Hann klæjar í fingurnar á hverjum degi og tekur reglulega sveiflur heima í stofu, mér og fögrum uppáhaldshúsmunum til mikillar armæðu. Það er löngu ákveðið að í Flórídaferðinni okkar tilvonandi í Nóvember verði ekki bara farið einu sinni heldur að minnsta kosti tvisvar á glæsilegan golfvöll (sem er reyndar mjög spennandi) og sömuleiðis á að kaupa allar þær golfvörur sem enn hefur ekki verið fjárfest í á góðu verði. Já, núna er það bara golf og ekkert nema golf!

Heill mánuður af aksjón!

2006-08-14T12:30:00.000Z

Svona í ljósi þess að mér var ókleyft að blogga í heilan mánuð vegna bilunar í bloggumsjónarkerfinu mínu hef ég ákveðið að skrifa hér ágrip yfir atburði þessa annars merkilega mánaðar.

Frá byrjun júlí hef ég fylgst vikulega með, eins og ég kallaði hann alltaf "wannabe Magna" í Rock Star Supernova á SkjáEinum. Hann hefur komið mér ánægjulega á óvart og svei mér ef ég er ekki bara farin að halda svakalega mikið með honum. Er ekki frá því að hann sé alveg í topp 3 þarna í þessum hóp - og believe me - ég er ekki hlutdræg!

Það er gaman að segja frá því að við Júlli létum verða af því að skrá okkur í golfklúbb í byrjun júlí. Klúbburinn er í Mosfellsdal og kallast Golfklúbbur Bakkakots (GOB). Við erum alveg búin að golfa villt og galið - aðallega galið samt - og ég held að Júlli sé farinn að dreyma sveifluna nánast á hverri nóttu.

21. - 24. júlí skrapp ég til Noregs ásamt mínum heittelskaða að heimsækja yfirmanninn hans. Þetta var samt engin vinnuferð heldur bauð hann okkur í eyjakofann sinn í miðjum Oslófirðinum þar sem við nutum þess að gera ekkert í nokkra daga. Veðrið lék við hvern sinn fingur, það var sannkallað Spánarveður - svo gott meira að segja að við gátum svamlað í sjónum án þess að fá kuldabólur! Æðislegt alveg! Komum að sjálfsögðu heim með brúnan og sællegan bjórvömb.

Fórum í mega fjölskylduútilegu um verslunarmannahelgina og gerðum ekkert nema elta sólina og jú - spila golf! :) Rúntuðum alla helgina og gistum aldrei á sama stað - sem borgaði sig því við fengum heldur betur frábært verður - sérstaklega á mánudeginum í Höfn í Hornafirði. Verð samt að viðurkenna að það er soldið mikið að keyra hringinn á fjórum dögum!

En þetta var sem sagt líf mitt í mjöööög grófum dráttum þennan mánuð sem ég bloggaði ekkert og svo skal ég reyna að vera duglegri!

Síðan komin í lag!

2006-08-10T12:52:00.000Z

Jæja lömbin mín - ef einhver er enn að slysast inn á síðuna mína eftir langt hlé þá fékk ég semsagt loksins svar frá Blogger administration og vandamálið mitt var lagað. Svo nú get ég aftur farið að blaðra um allt og ekkert - húrra!

Ó María

2006-07-10T14:41:00.000Z

Ég veit ekki með ykkur en mér finnst útfærslan af hinu gamla góða íslenska lagi Ó María sem tekin var í Söngkeppni framhaldsskólanna í vor alveg sérlega flott. Og ég náði mér að sjálfsögðu í lagið á musik.is fljótlega eftir það. Mér voru hins vegar að berast þær fréttir að það væri komið út myndband við lagið sem hægt er að nálgast hér.

Útileguveikin mikla

2006-06-30T14:09:00.000Z

Ég hef alltaf verið sérlega mikið gefin fyrir útilegur. Ég bókstaflega ELSKA að vakna upp í tjaldi, nudda stírurnar úr augunum, renna frá tjaldhurðinni og blikka framan í morgunsólina sem skín á döggina sem enn eimir eftir af á grasinu. Áður en ég gerist of ljóðræn þá semsagt bauðst mér og mínum að fara í útilegu þessa helgina og ég hoppaði hæð mína af gleði enda hef ég beðið lengi eftir að komast í eina slíka. Nema hvað, manneskjan sem haldin hefur verið útileguveiki síðan fyrsti sumargeisli sólarinnar braut sér leið í gegnum vorið, varð skyndilega uppfull af kvefi og leiðindum og kemst ekki með! Sannkölluð ólukka! En þið hin, þið skemmtið ykkur vel og sýnið mér myndir!

Hrikalegir Hollendingar!

2006-06-25T21:28:00.000Z

Portúgalar unnu glæsilegan sigur á Hollenska landsliðinu rétt í þessu mér til ómældrar ánægju. Ég hafði nú ekkert sérstaklega mikið á móti Hollendingum fyrir þennan leik en nú hef ég sannkallaða óbeit á þeim. Þeir voru ekki bara óheiðarlegir í leiknum þar sem þeir létu sig ítrekað falla eins og keilur í vítateig Portúgala við minnstu snertingu með glæsilegum leikrænum tilburðum heldur voru þeir óhemju grófir líka og eru hugsanlega búnir að valda því að hinn ungi Ronaldo sé meiddur. Og þegar dómarinn stoppaði leikinn í miðri stórsókn Portúgala vegna leikmanns sem lá meiddur á vellinum og leikurinn byrjaði að nýju án þess að Hollendingar létu Portúgala fá boltann ætlaði ég ekki að verða eldri. Óíþróttamannlegasta hegðun sem ég hef séð lengi! Þarna gjörsamlega missti ég allt álit á Hollendingunum og vonaði innilega að þeir myndu tapa leiknum - sem þeir og gerðu. En stórbrotinn og yfirmáta dramatískur leikur svona allt í allt og klárlega sá skemmtilegasti á HM fram að þessu.

Ofboðslega fræg!

2006-06-23T14:10:00.000Z

Jamm og jæja. SKO komið með ríflega 1000 viðskiptavini enda fólk smám saman að átta sig á að því að SKO er ódýrara. Og af því tilefni fengum við auðvitað þúsundasta viðskiptavininn í heimsókn og gáfum honum þennan fallega bleika blómvönd. Og eitt leiddi af öðru og allt í einu er maður bara á mbl.is!

Miðnæturgolf á sumarsólstöðum

2006-06-22T19:50:00.000Z

Ég fór með Sigga bróður mínum í gærkvöldi kl. 10 á æfingavöllinn á Keilisvelli í Hafnarfirði. Það var alveg frábært veður, blankalogn (virðist oft vera þannig síðla kvölds) og stórkostlegt sólsetur þennan lengsta dag ársins. Verst að ég var ekki með myndavélina - hefði auðveldlega getað smellt af eina stórglæsilega. En þetta var alveg hreint frábært, mér gekk betur en nokkru sinni áður og ég er sko heldur betur komin með bakteríuna. Ég er sko búin að finna mér mitt sport svona í ljósi þess að ég má ekki spila fótbolta. Svo... ef ykkur langar í golf, endilega hringið í mig! :D

Kjaramál

2006-06-21T15:49:00.000Z

Heyrði í útvarpinu í dag að launahækkanir hefðu ekki verið svona miklar á einu ári síðan sautjánhundruð og súrkál. Kjarabaráttan virðist því hafa gengið nokkuð vel. Hins vegar hefur efnahagsástandið ekki verið sem skildi og hin mikla verðbólga sem hefur hrjáð landann undanfarna mánuði hefur því að miklu leyti étið upp mestan hluta þessara launahækkana. M.v. verðbólgu er kjarasabótin nú aðeins rétt rúmlega 2% sem er ekki neitt m.v. að samningarnir ná nokkur misseri fram í tímann og verðbólguvæntingar eru ekki svo ýkja góðar!

Svo ég fór allt í einu að spá - hvernig er það fyrir okkur hin sem ekki vinnum hjá ríkinu eða sveitarfélögunum og semjum um laun beint við atvinnurekandann án milligöngu kjaranefndar eða annarra sem koma að þessu máli. Segjum sem svo að í árlegu launaviðtali sé krafist 5% launahækkunar. Eigum við þá að krefjast þessara 5% hækkunar + hækkun sem nemur verðbólgu??? Segjum að ástandið sé eins og það er nú, 8% verðbólga. Ef ekki væri beðið um þessa auka launahækkun sem nemur verðbólgunni væri maður í raun að lækka um 3% í launum EFTIR að beðið hefur verið um þessa 5% hækkun sem er auðvitað algjörlega óraunhæft. þannig að þegar svona árar og stjórnvöld og Seðlabankinn missa algjöra stjórn á verðbólgunni á maður þá e.t.v. að biðjia um 15% launahækkun ef maður vill í raun fá 5% hækkun??? Anyways... fór bara að pæla...

Júlli og Jake í Melrose Place

2006-06-19T16:12:00.000Z

Ég er búin að gera nýja og undursamlega uppgötvun - Melrose Place! Ég var semsagt aldrei með Stöð 2 þegar ég var yngri og ég hef öðlast æskuljómann á ný og hreint út sagt ELSKA Beverly Hills og Melrose Place! Ég er líka nett hrifin af Jake (Grant Show) enda maðurinn óhemju líkur honum Júlla! Og ég er ekki ein um þá skoðun! Gummi Jóh, starfsmaður Símans sem ég er í reglulegu sambandi við útaf vinnunni, sá myndina af okkur á msn og sagði við mig að fyrra bragði: "Strákurinn á msn-myndinni þinni er alveg svakalega líkur Jake í Melrose Place!" :Þ

Sjónvarpsógeð!

2006-06-16T15:21:00.000Z

Muniði þegar maður var lítill, þá var alltaf verið að hræða mann frá því að horfa of mikið á sjónvarpið með því að segja hluti eins og "þú færð ferköntuð augu ef þú heldur þessu áfram" eða eitthvað þessu líkt. Nú er komið að þeim tímapunkti að ég er næstum á því að þetta sé rétt. Ég er gjörsamlega orðin heiladauð af sjónvarpsglápi eftir síðustu viku. Síðan HM byrjaði hefur verið kveikt á sjónvarpinu innan við mínútu eftir að komið hefur verið heim. Og þegar leikir dagsins eru svo loksins búnir er allt of auðvelt að skipta bara um stöð. Svo allt í einu er klukkan bara orðin hálf eitt og maður er ekki búinn að gera annað síðan heim var komið en að glápa á impagassann! Nú er komið nóg - ég ætla að fara að lifa lífinu, koma blóðinu á hreyfingu, labba upp á Esjuna, fara út að hjóla, lækka forgjöfina og hitta fólk! Ég er komin með algjört ógeð á sjónvarpi!

Fúzzball!

2006-06-14T15:06:00.000Z

Það hefur varla farið framhjá neinum að HM er byrjað. Ég þakka guði fyrir að hafa fengið dágóðan skammt af fótboltaáhuga í vöggugjöf því annars værum við Júlli sennilega skilin að borði og sæng! En ég hef lúmskt gaman að þessu og er bara nokkuð sátt við það hvernig þetta fer af stað. Var t.d. að horfa á Spán valta yfir Króata rétt í þessu og ég held að ég sé bara búin að finna liðið sem ég held með í þessari keppni - Áfram Spánn! Yndislega skemmtilegt lið, valinn maður í hverri stöðu, sóknarbolti og svona alveg myndarlegir í þokkabót - það skemmir ekki fyrir!

En bara svona ein pæling - hvað er málið hjá Sýn í fyrsta lagi að láta kosta 15000 kall að horfa á HM ef þú hefur ekki verið með sýn í vetur!!! (ég lenti reyndar ekki í því). Og í öðru lagi - afhverju eru þeir með feik HM bolta í myndverinu hjá sér!!! Þeir hafa eytt heilum haugum af peningum í einhverja 27 plasmaskjái en geta svo ekki einu sinni orðið sér út um alvöru HM bolta! Mér finnst það soldið glatað!

Bróðir minn ljónsheili

2006-06-09T12:58:00.000Z

Ég er ekkert smá ánægð með fluggáfaða, heimspekilega, hávaxna litla bróður minn. Hann var að útskrifast úr 10. bekk og haldiði að hann hafi ekki bara dúxað! Jájá, heldur betur, með meðaleinkunnina 9,63 sem er ekkert slor! Hann tók bókstaflega við verðlaunum fyrir allar námsgreinar sem hann tók, fékk varla að setjast milli verðlauna og í lokin var fólk hreinlega farið að glotta þegar nafn hans var kallað upp. Hann er náttúrulega ekki bróðir minn fyrir ekki neitt! :Þ

OFUR-Ragga?

2006-06-02T00:24:00.000Z

Ókey. Núna er ég búin að drösla sjálfri mér í bootcamp í næstum tvo mánuði, meira eða minna 3 daga í viku og svitna eins og skepna. Mega púl svo ekki sé meira sagt svo tjahh.. ég var farin að halda að ég væri nú að komast í þokkalegt form. Nema hvað, ég ákvað því að skella mér í einn léttan spinning tíma í gær svona til að bæta upp letina fyrr í vikunni og BOY OH BOY! ...tilvitnunin "mikið vatn runnið til sjávar" átti nú bara alveg hreint ágætlega við mig! Það hreinlega gusaðist af mér svitinn hægri vinstri! Loksins loksins, þegar tíminn var blessunarlega búinn, drattaðist ég dauðuppgefin heim á leið, hafði varla orku til að henda mér í sturtu og það eina sem ég gat gert í kjölfarið var að fallast í rúmið og lognast útaf. Ofur-Ragga my as!

Kristall plús

2006-05-31T12:19:00.000Z

Ég veit ekki hvað það er en Kristall plús hefur ánetjandi áhrif á mig. Mér finnst þessi drykkur einfaldlega OF góður!!! Þetta minnir um margt á djús en er samt vatn - svalandi og gott - sérstaklega í stóru glasi fullu af klaka. Ég skora hér með á Egils að hefja framleiðslu á Kristal plús í tveggja lítra flöskum!

Myndir myndir

2006-05-31T11:30:00.000Z

Jæja, þetta tók tímann sinn. Það er svona þegar maður kemur heim úr vinnunni og rotast bara þangað til daginn eftir! ...en myndirnar eru semsagt komnar og hægt er að nálgast þær hérna hægra megin á síðunni...

Kvarthundrað ára

2006-05-29T11:48:00.000Z

Stórkostleg helgi að baki. Ég hélt upp á 25 ára afmælið með pompi og prakt. Tók föstudagskvöldið rólega og bauð nánustu fjölskyldu í mat. Á sjálfan afmælisdaginn var svo boðið í heljarinnar partý og (eins og glöggir lesendur bloggsins ættu að vita) var Celebrity þema. Við skötuhjúin vorum James Bond og Marilyn Monroe en fleiri frægir létu sjá sig og ber þar helst að nefna Angelinu Jolie í gervi Mrs. Smith (Tóta), félagana úr Brokeback Mountain (Sammi og Óli), Jón Ólafs og Hildi Völu (Helgi og Harpa), Jude Law & Sienna (Sævar og Svanhildur), Reservoir Dogs (Atli, Gunni, Simmi og ehh... Krissi - þó sá síðastnefndi hefði nú ekki alveg verið að gera góða hluti - sjá myndir), Man in Black (Inga og Árni), Keanau Reeves (Margeir) og síðast en ekki síst verkfræðisnillinginn og verðandi strokufanginn í Prison Break (Össi) sem vann einmitt verðlaunin. Því miður náðist engin góð mynd af strokufanganum en eins og allir sem mættu í partýið sáu þá hafði drengurinn lagt gríðarlega mikið í búninginn og m.a. tattúverað á sig mynd af fangelsinu með svörtum tússi - ótrúlegur metnaður! Að lokum, ég skemmti mér stórkostlega - kærar þakkir fyrir komuna og takk kærlega fyrir mig!

Grátbroslegt augnablik Unnar Birnu

2006-05-26T11:09:00.000Z

Ég veit ekki alveg afhverju en einhverra hluta vegna dett ég alltaf inn í það að horfa með öðru auganu á Ungfrú Ísland í sjónvarpinu. Keppnin var venju fremur frekar litlaus og mér stóð nákvæmlega á sama hver myndi hreppa titilinn. Ástæðan fyrir þessu bloggi mínu um þessa annars frekar ómerkilegu sjónvarpsupplifun var eitt grátbroslegt augnablik sem átti sér stað (og flestir hafa eflaust fengið veður af). Ungfrú heimur 2006, Unnur Birna, datt nefnilega illilega á hausinn skömmu eftir að hafa haldið glæsilega ræðu. Hún datt meira að segja svo illa að alheimskórónan glæsilega steypist af hinu fagra höfði Unnar Birnu og á gólfið. Ég verð að viðurkenna að ég hló dátt þegar ég sá þetta en ég get heldur ekki annað en viðurkennt að ég sárvorkenndi henni því það er alveg ljóst að þetta myndband mun berast vítt og breitt um allan heim (m.a. vegna fólks eins og mér sem bloggar svo um þetta á netinu). Smellið hér ef þið hafið ekki séð þetta.

Celebrity þema

2006-05-24T03:48:00.000Z

Nú er það ekkert nema metnaðurinn. Ég hef ákveðið að hafa þema í afmælinu og það ekkert smá þema - hvorki meira né minna en Celebrities. Þetta er frábær leið til að brydda aðeins upp á þetta venjulega djamm og gera eitthvað skemmtilegt (en samt vera fabulous fyrir bæinn þar sem þemað býður alveg upp á það) og því um að gera fyrir fólk að upphugsa eitthvað sniðugt og skemmtilegt og kýla svo á það! Og svona til að krydda þetta aðeins og búa til smá keppnisanda þá ætla ég að hafa verðlaun fyrir heitasta celebinn sem mætir svo nú er um að gera að hafa smá metnað! :)

Gleði á laugardaginn

2006-05-23T11:35:00.000Z

Næstkomandi laugardag verður gleði og glaumur í litla kotinu heima - daman að verða tuttuguogfimm og svona og því um að gera að bjóða heim her af fólki í smá gleðskap. "Smá" er samt kannski ekki rétta orðið en það bjargast - vonandi verður veðrið bara sómasamlegt og þá getur fólk kannski verið úti. Öllum þeim sem hafa rænu á því að kíkja inn á þessa aumu síðu mína er því hér með boðið...

CRAFT-syndrome

2006-05-12T09:19:00.000Z

Ég sat um daginn á biðstofu og gluggaði í glæpsamlega gamalt tímarit frá því 1998. Ekkert merkilegt við það svo sem fyrir utan það að ég rakst á alveg sérdeilis prýðilega grein. Flestir þekkja hugtakið "Alzheimer Light" sem vísar til fólks eins og mín, sem er sérdeilis utan við sig, keyrir í vinnuna þegar það er á leið í heimsókn til tengdó, steingleymir hvar bíllyklarnir eru (og svo eru þeir í lófanum), stoppar oftar en ekki í miðri setningu og segir "bíddu, hvað var ég aftur að tala um" eða eitthvað þaðan af aulalegra. En greinin setti þetta fram í mun kaldranalegra ljósi. Ég er ekkert með Alzheimer Light - það er mun alvarlegra en svo. Ég þjáist af CRAFT-syndrome. Þetta er háþróaður sjúkdómur sem hefur herjað í síauknum mæli á Homo Sapiens í vestrænum heimi undanfarin 100 ár. Sjúkdómurinn leggst á heilabörkinn og lamar hann smátt og smátt. Þetta er auðvitað háalvarlegt mál og er kannski aðeins skiljanlegra þegar skammstöfunin er skoðuð nánar. CRAFT-syndrome stendur nefnilega fyrir "Cant Remember A Fucking Thing"! :Þ

Spegill sálarinnar í molum?

2006-05-10T15:52:00.000Z

Jæja gott fólk, haldiði að ég hafi ekki hent mér fyrir björg á föstudaginn og lagt mín dýrmætu augu í hendur læknis sem var vopnaður leisergræjum. Ég fann ekki fyrir minnsta sársauka en mér fannst þetta talsvert óþægilegt. Kannski ekki skrýtið í ljósi þess að sogblöðku er skellt á augað svo þú blindast tímabundið, því næst heyrist mótórhljóð og þú finnur (án sársauka þó) þegar flipi er skorinn á hornhimnuna (þetta glæra ytra lag sem hylur augun). Í kjölfarið ferðu aftur að sjá en þó mjög óljóst rautt blikkandi ljós sem þú þarft svo að stara hreyfingarlaus á í ca. hálfa mínútu á meðan læknirinn beitir leisertækninni ógurlegu á augun og þú finnur daufa en óhugnanlega brunalykt í loftinu. *hrollur* ...en ég er búin og þetta hefur gengið svona þokkalega. Ég komst í kjölfarið að því að ég sef ekki með alveg lokuð augun - augun mín eru jahh.. of stór og útstæð fyrir litlu sætu augnlokin mín! Þetta hefur orsakað mikla þurrtíð og því hef ég þurft á utanaðkomandi kvökvunarbúnaði að halda til að halda rakastiginu í jafnvægi. Ég get auðvitað ekki annað en krosslagt fingurna og vonað það besta og það verður svo spennandi að vita hvað doktorinn segir á föstudaginn í eftirskoðun númer tvö.

Er hægt að markaðssetja niðursveiflu?

2006-05-04T18:32:00.000Z

Í gær brá ég mér á hádegisverðarfund á vegum Ímarks en umfjöllunarefni fundarins var "Markaðstækifæri á tímum niðursveiflu". Tveir ágætir fyrirlesarar héldu tölu og í mjög stuttu máli var niðurstaðan sú að það borgar sig fyrir fyrirtæki að halda markaðssetningu í horfinu (jafnvel að auka hana) þegar illa árar í samfélaginu. Þetta var þó ekki markmiðið með þessum skrifum mínum þó það séu eflaust einhverjir löngu hættir að lesa þennan litla pistil minn þegar hér er komið við sögu - (pabbi er klárlega einn af þeim þar sem hann er mesti andstæðingur markaðsafla sem ég hef kynnst). Þið hin eruð hins vegar svo heppin að fá að vita meira. Ég fór nefnilega að velta vöngum í kjölfar fundarins hvað umfjöllun í fjölmiðlum (PR) og annað markaðsstarf getur haft gífurlega mikil áhrif á fólk - hvað varðar tilfinningu fyrir niðursveiflu eins og annað. Og núna undanfarið hefur varla verið þverfótað fyrir svartsýnisröddum um íslenskt efnahagsástand í fréttamiðlum landsins. Það kemur því ekki mikið á óvart að í nýjustu könnun Gallups kemur einmitt í ljós að svartsýni Íslendinga hvað viðkemur efnahagsmál hefur aukist töluvert frá áramótum. Og ég held svei mér þá að hægt sé að markaðssetja allt - líka niðursveiflu!

Á toppnum!

2006-04-30T20:18:00.000Z

Loksins kom að því að ég stóð við stóru orðin og drefi mig upp á Esjuna. Við Gunni frændi skelltum okkur saman og ég verð nú bara að viðurkenna að það var vasklega gengið. Það dugði þó ekki til að standast markmiðið sem við settum okkur að vera aðeins 2 tíma upp og niður - við enduðum á 2 klst. og 45 mínútum. En þetta stendur allt til bóta í næstu ferð! :Þ ...sjá fleiri myndir hér.

Nóg um að vera á næstunni

2006-04-28T10:14:00.000Z

Það var yndislegt veður þegar ég vaknaði í morgun og ég gat ekki annað en glaðst og horft björtum augum fram á veginn. Og það er sko heldur betur nóg um að vera á næstunni. Í kvöld er stórafmæli hjá Árna Valda, þrítugum manninum og ljóst að það verður heldur betur margt um dýrðir. Á sunnudag á Gunnar, bróðir hans Júlla, afmæli og í ljósi þess að foreldrarnir eru einhvers staðar að ferðast úti í heimi ætlum við Júlli að standa fyrir smá grillmat í tilefni afmælisins. Afi Siggi á svo afmæli á mánudag, 1. maí en þá ætlum við SKO stöllur að fagna góðu gengi í fyrsta rekstrarmánuðinum. Siggi litli bróðir á 16 ára afmæli miðvikudaginn 3. maí en getur víst lítið fagnað því í ljósi þess að hann er í miðjum samræmdum prófum (I feel for you brother). Ég mun svo láta krukka í augunum á mér föstudaginn 5. maí og strax daginn eftir á Eva María 25 ára afmæli og ætlar að sjálfsögðu að halda upp á það. Ég mun klárlega skjóta upp kollinum í smá stund en sé ekki fram á að leggja of mikið á augun svo fljótt eftir aðgerðina og mun því sennilega staldra stutt við. Strax í kjölfarið hefst undirbúningur fyrir mitt 25 ára afmæli (jahérna hér - endalaus stórafmæli) en það vill einmitt svo skemmtilega til að ég á afmæli á laugardegi svo ég mun klárlega gera eitthvað sprell úr því...

Nú þarftu SKO að bregðast skjótt við!

2006-04-25T10:15:00.000Z

Í gær fengu fjölmargir einstaklingar "glaðning" inn um lúguna hjá sér sem á stóð: "Nú þarftu SKO að bregðast skjótt við!" Eflaust hefur mörgum brugðið í brún og rifið upp umslagið til þess eins að sjá reikning upp á 0 kr. fyrir innan. Í kjölfarið var mjög gaman að fylgjast með umræðunni í netheiminum (t.d. inni á barnalandi) en það var greinilegt að fólk var annað hvort mjög ósátt eða verulega hrifið. Og nú spyr ég, hvað finnst ykkur um þetta uppátæki?

Jafnréttissinni eða kvenremba

2006-04-24T22:30:00.000Z

Það gerist iðulega að umræða um jafnrétti skýtur upp kollinum og ekkert nema gott um það að segja. Ég er nefnilega mikill jafnréttissinni, finnst að fólk eigi að hafa jafnan rétt óháð kyni eða þjóðerni eða öðru sem greinir okkur að. Því hreinlega þoli ég ekki þegar umfjöllunin gerir það að verkum að langleggjaðar rauðsokkur stinga upp kollinum og tala svo fleðulega um það hvað konur eiga það bágt. Það getur vel verið að það vanti enn eitthvað upp á að við kynsysturnar séum á nákvæmlega sama stalli og hinn helmingur jarðarbúa hvað varðar laun fyrir sambærileg störf og fleira í þessum dúr en við höfum það nú ekki svo ýkja slæmt að mínu viti. Ég er meira að segja bjartsýnismanneskja og trúi því staðfastlega að þetta sé hægt og rólega að ná jafnvægi nú á tímum þegar konur ráða ríkjum í háskólum landsins. Því finnst alltaf miður þegar brúnaþungar svartsýnisraddir missa út úr sér orðinu "kvennréttinabarátta" því jafnréttisbarátta á einfaldlega mikið betur við á okkar tímum. Og hana nú!

Bubble er tímaþjófur dauðans!

2006-04-23T23:01:00.000Z

Úff... ég er held ég orðinn spilafíkill. Og þá meina ég ekki í póker eða öðru sem felst í peningaupphæðum, heldur er ég orðin gjörsamlega "húkt" á Bubble en link inn á leikinn má finna hér neðar hægra megin á síðunni. Ég vara ykkur við - ekki prófa þetta ef þið hafið ekki nægan tíma á ykkar könnu! Svo er líka sniðugt, svona ef þið skylduð vera veik og að drepast úr leiðindum, að kíkja inn á leikjanet.is. Þar er hægt að finna marga ágætis tímaþjófa! :Þ

Apríl er yndi!

2006-04-21T13:27:00.000Z

Það er merkilegt við aprílmánuð hvað hann er uppfullur af frídögum. Fyrir það fyrsta var páskafríið mun lengra en síðasta jólafrí og svo vinnur maður varla heila vinnuviku vegna einstakra frídaga. Merkilegt hvað svona lagað getur latt mann rosalega, maður varla nennir að drattast í vinnuna þessa fáu daga sem maður þarf að mæta! :)

Gamla góða Ísland

2006-04-18T22:22:00.000Z

Síðan við Júlli útskrifuðumst höfum við alveg leyft okkur að njóta lífsins ef svo má segja. Við erum jú sannkölluð dink's (double income, no kids) og höfum því alveg efni á því. Pabbi gamli reynir þó reglulega að pota sparnaðarráðum að okkur og það er auðvitað ekkert nema gott um það að segja. Það er ágætt að einhver togi mann niður á jörðina annað slagið. Við skötuhjúin höfum því ákveðið að sýna skynsemi í sumar og eyða sumrinu hér á fróni. Það verður því settur metnaður í að elta sólina, henda upp tjaldinu hér og þar, grilla á ferðagasgrillinu, flatmaga á vindsængum, krúsa í útilegustólunum, lyfta glösum og já ef til vill skótast upp á einstaka fjallstind svona rétt upp á stemmninguna. Lætur það ekki vel í eyru???

Buzz!

2006-04-18T19:42:00.000Z

Ég er búin að gera stórkostlega uppgötvun. Buzz! spurningaleikinn fyrir PS2. Þetta er unaðslega skemmtilegt spil. En ég er víst voða eftirá þar sem Berglind og Karen fengu spilið víst fyrir áramót! Uhmm... en allavegana þá er þetta samt bara gaman og ég mæli eindregið með leiknum. Yfir páskana fengum við Júlli ágætis hjálp frá Ingu, Árna og fjölskyldunni hans við að nauðga þessum blessaða leik. Ég gerði lítið annað en að tapa, náði m.a. þeim undraverða árangri að fá 0 stig í einum leiknum - hefði sennilega verið í mínus ef það hefði verið hægt! :Þ

Jack Bauer, Marissa Cooper og allt þar á milli

2006-04-11T21:59:00.000Z

Ég fór að velta því fyrir mér áðan hvað ég væri rosalega dottin út úr sjónvarpsmenningunni eftir að ég hætti í HR. Maður var auðvitað alltaf inni í nýjustu þáttunum og nýjustu seríunum þar en núna veit ég bara ekkert hvað er í gangi. Núna er ég bara föst í sama farinu og þá, horfi alltaf á The OC (já ég veit, þetta eru gelgjulegustu þættir í heimi en ég fæ bara nostalgígju þegar ég horfi á þá), The Bachelor af gömlum vana og jú reyndar hef ég reynt að fylgjast með hinum stórskemmtilegu Sex inspectors þáttum. Mér finnst þeir hreint út sagt frábærir! Maður skiptist milli þess að skellihlæja að aumingja fólkinu sem er í sviðsljósinu hverju sinni og þess að hugsa "hmm... þetta var nú helvíti sniðugt". Og þá er ég ekkert endilega að tala um einhverja stórkostlega nýja hugmynd fyrir svefnherbergið - þættirnir taka nefnilega ekki síður á samböndum almennt. Mér finnst þessir þættir bara hrein snilld! Ég kemst samt ekki hjá því að spyrja hvort ég sé kannski ein um það??? ...og er ég e.t.v. að ræða eitthvað núna sem maður annars gerir bara í saumaklúbbnum??? :Þ

Jæja, svo fylgist ég alltaf með 24 á sunnudögum - algjört möst - en ég sver það, eftir lokaþáttinn í Threshold held ég að ég segi bara pass! Þetta var sá allra lélegasti lokaþáttur sem ég hef séð! Hefði alveg eins getað verið úr einhverri grútlélegri, illa leikinni, fyrirsjáanlegri og hlægilegri B-mynd! En semsagt - þetta er pretty much sjónvarpsdagskráin mín!

Look who's back!

2006-04-11T15:10:00.000Z

Loksins heyrist eitthvað frá mér eftir nokkuð langt hlé. Það er bara búið að vera allt vitlaust að gera bæði í vinnu og einkalífi. Fyrst og síðast langar mig að nefna að í dag á hann Júlli minn afmæli og því ætlum við að reyna eitthvað smá að halda upp á það.

Ég náði að byrja í Bootcamp á þessari rúmu viku sem ekkert heyrðist frá mér og ég er núþegar búin að mæta í 3 tíma og gvöð minn góður - þetta ERU sannkallaðar þrælabúðir - en ég fíla þetta. Mér finnst bara miklu skemmtilegra að vera í hóp frekar en að vera ein að æfa í líkamsræktarstöð!

Það gengur frábærlega með SKO og viðskiptavinum fjölgar mun hraðar en við þorðum að vona. Það er ljóst að mikill áhugi er fyrir því að lækka símreikninginn hjá sér og ég mæli með því við alla að kíkja inn á www.sko.is - þetta er í alvörunni helv... sniðugt! :)

Vá, þegar ég byrjaði að skrifa var ég með þvílíka romsu til að tala um en man lítið sem ekkert af því núna. Það er kannski bara ágætt - þá get ég komið með fleiri bloggfærslur á næstu dögum :)

Sjáumst hress,
Ragga

SKO

2006-04-01T12:26:00.000Z

Jæja lömbin mín. Nú get ég loks tjáð mig af einhverju viti um vinnuna mína. Undanfarna mánuði hef ég staðið í undirbúningi að stofnun nýs lággjalda símafyrirtækis. Og á hádegi í dag var það formlega opnað. Félagið heitir SKO og svipar til Telmore (Danmörk) og EasyMobile (Bretland) fyrir þá sem það þekkja en þessi félög hafa gjörbylt farsímamörkuðunum í sínum heimalöndum.

Ég er svo þreytt núna eftir vökunætur síðustu daga að ég hef bara ekki orku til að útskýra þetta nánar en hér er a.m.k. lógóið og slóin á síðuna er www.sko.is fyrir þá sem vilja smella sér inn og skoða málið.

Belja á svelli!

2006-03-31T14:21:00.000Z

Svo virðist sem eitthvert óskiljanlegt samhengi sé að myndast milli vinnunnar minnar og þess að ég flýg á hausinn. Þetta er hreinlega orðið daglegt brauð! ...og þetta er alltaf eitthvað stórkostlega dramatískt fall sem ég tek á mig. Fólkið í kring veit aldrei hvort það á að hlæja eða gráta, maður heyrir kannski einn flissa, annan reka upp hrossahlátur og þann þriðja taka mega andköf. Og hvort sem þið trúið því eða ekki var ég að fatta rétt í þessu að ég er búin að vera með miða á bakinu um óákveðinn tíma sem á stendur "belja á svelli"!!!!! Ég hló náttúrulega brjálæðislega þegar ég fattaði það en mér er samt alveg jafn illt í olnboganum fyrir því! ;Þ

Bréfaskriftir

2006-03-28T21:47:00.000Z

Það er eitthvað við bréfaskriftir (og þá meina ég bréf þar sem maður þarf að nota blað og penna) sem er alveg hrikalega kósý og sjarmerandi og rómantískt að mínu mati. Hérna áður fyrr, áður en heimurinn tæknivæddist, var fólk actually í því að skrifa hvort öðru bréf. Mamma hefur til dæmis oft talað um það að á hveitibrauðsdögum þeirra pabba, þegar pabbi bjó í Danmörku (án okkar mæðgnanna) í heilt ár, voru ofurrómantísk, væmin og tárfallin bréf nánast daglegt brauð. Maður verður líka alltaf miklu háfleygari og dramatískari þegar maður skrifar einhverjum á pappír - samanborið við að skrifa e-mail eða msn! Í stað þess að segja: "hæ. Hvasiru, eriggi allt got tað frétta?" er maður meira í þessum pakka: "Elsku Anna, mikið er langt síðan ég hef séð þig. Tíminn líður alveg ótrúlega hratt. Hvað er að frétta af þér og þínum?" Kannski er ég að verða eitthvað meir ég veit það ekki, en ég væri alveg til í eins og eitt stykki bréf!

Stelpurófa eða bissnesskona

2006-03-28T13:24:00.000Z

Eins og duglegir lesendur þessarar síðu tóku eflaust eftir var Júlli kominn á fremsta hlunn með að raka allt hárið af. Hann lét þó ekki verða af því heldur klippti hárið bara stutt og er alveg svakalega sætur. En haldiði að ég hafi ekki fylgt í kjölfarið og klippt helminginn af hárinu burt í gær. Jájá, ég er bara aftur orðinn stutthærð stelpurófa. Einhver myndi kannski segja að þetta væri Guðfinnuklipping hahaha... ...en talandi um Guðfinnu. Ég sel það nú ekki dýrar en ég keypti það en einhvern tíma heyrði ég að hún væri alltaf með þessa klippingu vegna þess að samkvæmt sálfræðirannsóknum á aðilum úr viðskiptalífinu er borin mest virðing fyrir bissnesskonum sem eru með háls- eða axlarsítt hár! Ég veit nú ekki með áreiðanleika þessara niðurstaðna en ég er allavegana orðin þannig! Sjáum til hvernig mér vegnar í viðskiptalífinu næstu vikurnar! :D

Að hafa skoðun á hlutunum

2006-03-27T13:45:00.000Z

Mín skoðun er sú að það er mjög mikilvægt að hafa skoðun á öllum mögulegu hlutum. Ef fólk hefur ekki skoðun á hlutunum hefur það engin áhrif á það sem er að gerast í kringum það því það eru skoðanir fólks sem raunverulega gera það að verkum að hlutirnir breytast. Ef fólk hefði ekki skoðun á hlutunum eins og þeir eru myndi engin ástæða vera til að gera breytingar til batnaðar - öllum væri hvort sem er alveg nákvæmlega sama. Því mæli ég eindregið með því að fólk hafi skoðun á hlutunum og láti ljós sitt skína - ekki síst hér á síðunni! :)

Það er svo ljúft að vera í skóla!

2006-03-25T16:39:00.000Z

Þegar ég var í HR gat ég ekki beðið eftir því að útskrifast. Ástæðan var ekki sú að það væri ekki gaman í skólanum, alls ekki. Meinið var að þá myndi maður ekki lengur þurfa að læra endalaust heima á kvöldin - sem ég gerði að sjálfsögðu ALLTAF! ;) - ekki að vera í stöðugri verkefnavinnu og reyna að finna tíma þar sem allir kæmust, maður þyrfti ekki lengur að taka próf og yrði bara með endalausan frítíma.

Jájá, einmitt, akkúrat! Ég held ég hafi aldrei haft það eins gott og ljúft og þegar ég var í HR. Og í dag er þetta líka stórkostlega veður, sól og blíða, og ég sit hérna í vinnunni og hamra á lyklaborðið - ekki beint í helgarfríi! Já, það var sko yndislegt að vera í skóla!

Drislexía = klaufaveiki

2006-03-24T15:37:00.000Z

Sumir dagar eru góðir dagar... aðrir ekki alveg svo góðir. Dagurinn í dag var ekki sérstaklega góður. Hann hefur einkennst af ótrúlegum hrakföllum svo ekki sé meira sagt. Ég vaknaði með hausverk, datt í stiganum í vinnunni (og ekkert svona smá hras - neinei, ég beinlínis valt niður stigann!), ég náði að sulla brúnum kaffibletti á nýju hvítu peysuna mína klukkan 10 og rauðum salsasósubletti í hádeginu. Ég byrjaði að vinna aftur eftir hádegismat og það gekk bara nokkuð vel í svona tæpan klukkutíma þangað til kom að því að vista skjalið sem ég hafði verið að vinna í - og viti menn, ég náði á einhvern ótrúlegan hátt að smella á "no" þegar forritið spurði hvort ég vildi vista - og klukkutíma vinna fór í súginn! Og til að kóróna allt náði ég að rekast á þennan indæla lyftuviðgerðarmann núna rétt fyrir skömmu og hella yfir mig alla brennandi heitu kaffi! *grmf*

Í haust kenndi Inga mér hrikalega sniðugt orð, nánar tiltekið orðið "drislexia" sem þýðir í raun klaufaveiki (ekki eins og kýr fá heldur meira svona aulagangur) og þá fannst mér þetta hrikalega sniðugt og fyndið - sérstaklega af því að Inga er með króníska drislexíu! ...en núna finnst mér þetta eiginlega ekkert fyndið! *hnuss* ...og það sem meira er - ég er enn með hausverk!

My blue blue eyes

2006-03-22T17:08:00.000Z

Glyrnurnar mínar eru alltaf faldar á bak við víravirki og til að stríða mér kallar Júlli mig reglulega gleraugnaglám. En kannski ekki mikið lengur! Ég er nefnilega á leiðinni í lazer-augnaðgerð eftir rétt rúmlega mánuð og hana nú!

Já ég dröslaðist á fætur eldsnemma í morgun til að fara í svokallaða "forskoðun" og boy oh boy hvað þetta er mikið sell! Ég gruna augnlækninn næstum því um græsku og að hann sé ekkert augnlæknir eftir allt saman vegna þess að hann var sölumaður dauðans!!! Það var allt fullkomið, hornhimnan mín var alveg sérstaklega þykk (sem er gott), og augun alveg sérlega kúpt (sem er líka gott) og allir taugaendar heilbrigðir (sem er mjög gott) og ég veit ekki hvað og hvað. Samkvæmt honum var ég hreinlega með alveg fullkomin augu fyrir svona aðgerð. Kemur á óvart! - auðvitað sagði hann það!

En jú, það var auðvitað ekki fræðilegur möguleiki að ég væri komin alla þessa leið til að hætta við! Ég var búin að setja dropa í augun sem sveið rosalega undan og eftir það leit ég út eins og versti dópisti bróðurpartinn af deginum ...svo ég lét sölumanninn mikla auðvitað plata mig til að bóka augnaðgerð föstudaginn 5. maí næstkomandi. Og eftir það - glasses no more! ...vonandi... og ég get verið sæt og fín og sýnt mín bláu augu án gleraugna eða linsna!

Á Kjúllinn að láta hárið fjúka?

2006-03-20T18:32:00.000Z

Kannski er það bara ég en mér finnst karlmönnum fjölga sem kjósa að sýna á sér beran skallann. Það fer nú reyndar mörgum nokkuð vel og þar má m.a. nefna Bruce Willis, Shield gaurinn (sem ég man ekki hvað heitir) og að sjálfsögðu Bubba ofurtöffara. En ég veit ekki, þarf maður ekki að vera með sérlega vel til fallið höfuðlag svo að svona hárleysi fari manni? Ég held til dæmis að fólk myndi taka stóran sveig í kringum mig og hugsa: "æji greyið hvað hún er vansköpuð þessi" ef ég myndi snoða mig. Ég er nefnilega með svona skemmtilegan þyrlupall í hvirflinum, þ.e. alveg sléttan (beinan) blett og auk þess með óeðlilega lítinn haus! En ef meginreglan er í raun og veru sú að maður þarf að vera með gott höfuðlag til að þola hárleysi, á sama regla þá við um snoðaða kolla??? Ég veit það ekki - en ég veit hins vegar að hann Júlli minn er alvarlega að hugsa um að snoða sig og ég veit ekki alveg hvað mér á að finnast um það. Mér finnst nefnilega dálítið flott þegar karlmenn eru snoðaðir (svona einhver hermannafílingur eitthvað) en það fer bara ekki hverjum sem er og maður bara veit ekki...!?!

Gengur allt snuðrulaust fyrir sig???

2006-03-19T22:49:00.000Z

Ég hef lengi vel stært mig af því að vera sannkallað íslenskufljóð og nánast grobbað mig af því að vera vel skrifandi. Eitt sinn lærði ég til dæmis máltækið "Bylur hátt í tómri tunnu" og að þessu sinni verð ég að viðurkenna að ég er einmitt þessi tóma tunna. Ég var nefnilega að uppgötva mér til mikillar skelfingar að ég hef alla ævi sagt og skrifað að eitthvað gangi snuðrulaust fyrir sig. En ég hafði víst algjörlega á röngu að standa! Hið rétta er nefnilega að víxla ð-inu og r-inu og skrifa snurðulaust. Mörgum mun eflaust finnast þetta kjánalegt og jafnvel leiðinlegt umræðuefni en ég bara stóðst ekki mátið og ég verð að fá að vita - eru einhverjir fleiri sem féllu í þessa sömu gryfju???

Talandi um fótbolta - fleiri myndir!

2006-03-18T14:07:00.000Z

Jamm og jæja, ég er heldur betur búin að hysja upp um mig brækurnar. Haldiði að ég hafi ekki verið að setja fleiri nýjar myndir inn á myndabankann minn! Að þessu sinni eru það myndir frá byrjun febrúar þegar við Júlli fórum til London ásamt Ingu og Árna til að fylgjast með Chelsea leggja Liverpool. Þetta var unaðsleg ferð og ég mæli eindregið með því að allir fari á fótboltaleik - stemmningin er einfaldlega ógleymanleg! Kíkiði endilega á myndirnar :D

Gunni Gunn og Eiður Smári

2006-03-17T09:44:00.000Z

Nei sko! Haldiði að það sé ekki mynd af Gunna frænda inni á fotbolti.net undir grein sem fjallar um Íslendinga með frægum fótboltamönnum. Og hann er nú ekki með neinum aukvissa á myndinni, engum öðrum en okkar ástkæra Eiði Smára Gudjohnsen!

Þeir sem vilja lesa meira um málið geta smellt hér.

Allt er nú til!

2006-03-16T14:15:00.000Z

Glöggir blogglesendur hafa ef til vill tekið eftir því að "fallega lestin" hefur verið á sveimi í bloggheiminum í dag. Ég var svo heppin að vera "klukkuð" af Erlu hér á blogginu mínu og af því að ég er soddan leiðindapúki ákvað ég að koma klukkinu bara á framfæri hér - geri ráð fyrir því að a.m.k. 8 manns sem mér þykir ákaflega fallegt sjái lestina hér og klukkist þar með ...þeir taka það til sín sem vilja ;)

YOU VE BEEN HIT BY THE

[^^^^^^^^^^^^]
[BEAUTIFUL truck ” ]";.., ___.
[ _…_…______==== ]___ …, ]
“(@) (@)”"”*(@) ” (@)**(@)

ONCE YOU VE BEEN HIT, YOU HAVE TO HIT 8 BEAUTUL PEOPLE. IF YOU GET HIT AGAIN YOU LL KNOW YOU RE REALLY BEAUTIFUL! SO PASS IT - HIT WHO EVER YOU THINK IS BEAUTIFUL!

Myndir frá Tælandi!

2006-03-14T00:05:00.000Z

Ég tók Erlu á orðinu og ákvað að henda inn nýjum myndum í úrelda myndabankann minn :) ...þetta eru yndislegar myndir frá Tælandi - sælla minninga... Vonandi bara að þessi framtakssemi mín gefi fyrirheit um það sem koma skal. Endilega kíkiði...

vinna vinna vinna vinna

2006-03-13T13:23:00.000Z

Jæja gott fólk. Framundan er mikill háannatími hjá henni Ragnhildi blessuninni - ekkert nema vinna, vinna og aftur vinna. Fólk er því beðið að halda ró sinni þó að daman komi ekki til með að sjást svo dögum skipti næstu vikurnar og það er algjör óþarfi að missa sig í brjálæði og lýsa eftir mannshvarfi. Raggan lofar nefnilega að endurkoman verði stærri og meiri en áður hefur sést og lýsir yfir heljarinnar gleði þegar törnin klárast. Er einhver geim?

P.S. strákar, þið ættuð að nýta tækifærið og draga Júlla með ykkur í strákaleiki...

Ég er löt í dag

2006-03-12T20:16:00.000Z

Úff, held að ég hafi aldrei á ævi minni verið jafn hrikalega ógeðslega löt eins og í dag. Ég sem venjulega hata að sofa lengur en til 11 um helgar lá í bælinu til rúmlega fjögur!!! ...og loksins þegar ég drattaðist framúr lá leiðin beint inn í stofu þar sem ég hlammaði mér í sófann og hef legið þar síðan - starandi á imbakassann án afláts!

Ný síða lítur dagsins ljós

2006-03-12T19:35:00.000Z

Haldiði að ég hafi ekki látið verða af því að búa mér til nýja bloggsíðu svei mér þá. Jújú, ég var orðin hálf pirruð á þessari gömlu enda var hún mikið að stríða mér. Ég gat hvorki sett inn tengla né myndir, hvað þá eitthvað þaðan af flóknara. Svo hér er hún komin, síða með alvöru virkni - endilega smellið inn linki á hana hjá ykkur.